22 طريقة مختلفة للفراخ تساعدك في رمضان من مطبخ مولا

للبنات اللي بتسال طرق مختلف للفراخ 22 طريقة تساعدك في رمضان كل سنة وانتم بخير.. 

1 - التبيله الفراخ الاستربس

المكونات 

• صدور فراخ بانيه
• 1 كوب دقيق
• 1 كوب ماء
• 1 بيضه
• 2 معلقه ثوم بودر
• 1 معلقة بابريكا
• ربع كوب خل
• معلقتين نشا
• معلقة ملح
• معلقه فلفل اسود 
• معلقه كبيره شطه 
• معلقه زعتر (صغيرة)
• نخلط كل المكونات
• نقطع الفراخ بطول
• ننقع الفراخ في التبيلة ويستحب من بلليل

القلي

• كوب دقيق
• ربع كوب نشا
• نص معلقه ملح 
• معلقه فلفل اسود 
• معلقه توابل فراخ 
• تلات معالق بيكنج بودر 
• يتخلط كل المكونات مع بعضها

ناخد من الفراخ من التتبيله من غير ما تصفي ونحطها في خلطه الدقيق و تحط عليها الدقيق بايدك من غير ما تمسكها و بعدين ونرجعها تانى في التبيلة ونحطها في الدقيق وبعدها علي الزيت سخن جدا

اول ما تحط القطع وطي النار علي الاخر عشان يستوي من جوا و شويه و زود النار اول ما تاخد لون قبل الدهبي كدا بشوية

2 - فراخ سويت اند ساور

مقادير الفراخ

نص كيلو صدور فراخ متقطعة مكعبات

• ٤ معالق دقيق
• معلقتين نشا
• معلقة صغيرة توم بودر
• رشة ملح وفلفل
• نص معلقة صغير بيكنج بودر
• نصف كوب ماء

مقادير الصوص

• ٣ معالق سكر
• معلقتين صويا صوص 
• ٣ معالق كاتشب
• معلقة خل
• معلقة نشا متدوبة في نصف كوب ماء
• فلفل الوان متقطع مكعبات او شرائح و بصل متقطع شرائح

بنحط الفراخ فالدقيق والنشا و التوم البودر والبيكينج بودر وعليهم الماية ونقلبهم مع بعض وننزلهم في زيت سخن يتشوحوا لحد ما يبقى لونهم دهبي كده و نحاول نفرق الفراخ عن بعض علشان متلزقش في بعض
ونشيلها من الزيت تتصفى و فنفس الطاسة هنشوح الفلفل والبصل لحد ما يدبلوا بسيط كده و نشيلهم و ونبدأ فالصوص بقى هنحط كل مقادير الصوص على بعض عالنار والنار متكونش عالية و نفضل نقلب لحد ما نوصل للسمك بتاع الصوص اللي انتوا عايزينه ولو تقل اوي ممكن نزود شوية ماية شوية شوية لحد ما يظبط معانا

وبس نحط الفراخ و الفلفل والبصل فالصوص ده ياخدوا غلوة مع بعض و نطفي عليه

3 - بيكاتا الدجاج بالمشروم

المكونات :

• صدور دجاج 
• مشروم 
• زبده
• كريمة طبخ
• ملعقه دقيق
• ملح /فلفل اسمر/رشه جوزالطيب/ رشه قرفه

الطريقه:

• تخلط البهارات كلها على الدجاج 
• في جريل او طاسة فيها قطعه زبده تحمر علي نار عاليه من الجهتين
• بعد ما تاخد اللون نشيلها من الجريل 
• في نفس الجريل نصفر بصله ونضيف عليها المشروم لحد مايفرقع كدا نكون مدوبين ملعقه دقيق في مايه ونزل علي المشروم 
• بعدين الكريمه السايله نضيف ملح وفلفل اسمر وبعدين نضيف الدجاج ونهدى عليها لحد ماتسوى في حدود نص ساعه كدا وبالف هنا 

4 - شيش طاووق
يفضل طبعا الاوراك بتكون طريه وسريعة في التسوية 

الطريقة:

• وراك مخليه ومتقطعه مكعبات 
• علبة زبادى
• بهارات( بصل بودر.. وتوم بودر.. وفلفل اسمر ..وبهار فراخ وملح.. وملعقه زيت.. وملعقه خل.. عصره ليمون.. وملعقه كاتشب او صلصة ..ملعقة مستردة)

و بالف هنا 

5 - فراخ رستو في الكيس الحراري

1. بعد نقع الفراخ في محلول الملح والدقيق والخل والكمون تغسل كويس وتنشف في الكبة نفرم بصلتين مع طماميه جدا ونضيف البهارات
2. ملح..فلفل اسمر..قرفه..شطة..بهارفراخ..سماق..وبابريكا.. بصل بودر..توم بودر..روزماري..زعتر..معلقتين زبادي..عصير لمونه..ملعقة زيت..ونص ملعقه عسل ابيض او اسود

نخلط كل المكونات ونتبل الفرخة من جوه ومن تحت الجلد ومن بره وتتساب في التلاجة حوالى ساعه

ونربط رجليها بالخيط
عملت معاها بطاطس وجزر وقطعت بصل وطماطميه صغيره مكعبات
تبلتهم بالملح وفلفل الاسمر والكسبره 
حطيتهم في الكيس الحراري وبعدها حطيت الفراخ
ونربط الكيس ونخرمة كذا خرم بخله الاسنان وتدخل فرن سخن ع ٢٠٠°لمده ساعه تقريبا

و بالف هنا

6 - علشان البنات اللي بتسال عن طريقه للفرخ غير البانيه

المكونات

• صدور فرخ 
• سلامي او رومي مدخن لو متاح
• فلفل اخضر والوان لو متاح
• زيتون مقطع 
• بقدونس مقطع
• طماطم مقطعه
• بهارات ملح.. وفلفل اسمر.. بصل بودر..بهار دجاج..بابريكا
• واي نوع جنبه مبشوره استخدمت قشقوان وموتزيلا 

الطريقه 

تغسلي الصدور كويس بمياه وليمون علشان متبقش زفره
تقطعي الصدور ذي ما وضح في الصوره وتبليها بملح وفلفل الاسود وتخشي الفتحات اللي عملتها بسكينه الزيتون والفلفل الالوان والطماطم المقطعه والبقدونس والجبنه الموتزريلا و تدخل الفرن حوالي 45دقيقه 

و بالف هنا

7 - كوردن بلو وبطاطس بيورية

اولا طريقه كوردن بلو:

• صدور فراخ مخليه 
• رومي مدخن او لانشون
• جبنه موتزريلا وجبنه شيدر استخدمت جبن حلوم 
• فلفل أخضر 
• زيتون
• ملح ، فلفل ، بابريكا ، نص معلقه توم بودرة نص معلقه بصل بودره ، معلقه بهار دجاج ، نص ليمونه
• بقسماط مطحون ، دقيق ، معلقه نشا ، بيضه مضروبه مع معلقه لبن

هتقطعي الفراخ زي البانيه وبتدقيها احط عليها البهارات كلها واقلبها ف بعض واعصر عليها الليمون
.اسيبها نص ساعه او ساعه تشرب التتبيلة
هتجيبي الرول الاسترتش الشفاف ده وتقطعي كذا حته ع قد الشرائح ال معاكي
هتحطي الشريحه وعليها الرومي وعليها الجبنه وزتيون والفلفل وبعدين الموتزريلا وتلفيها زي الرول وبعدين تلفيها ف الاسترتش ده وتعمليها زي البنبوني كده 
لما تخلصي تحطيهم ف الفريزر نص ساعه عشان يمسك ف بعضه 
في طبق اخلطي الدقيق مع النشا مع البقسامط
هتفكى الاسترش من الشرئح وتنزليها في البيض وبعدين خليط الدقيق 
دخليها الثلاجة حوالى نص ساعه كمان
تكوني مسخنه زيت ويكون كميه كبيره بحيث يكون عميق واول ما يسخن توطي عليه
ننزل فيها كوردن بلو حتي يستوي

طريقه الصوص:

في حلة ع النار فيها ملعقه زبدة او سمن ضيفي ملعقه دقيق لحد ما يصفر لونه انزلي كوباية لبن وملعقه كبيره من المسطرده وملعقه كبيره من الجبن الكريمي وملح وفلفل اسمر وقلبي فيه لحد ما يبدأ يبكبك ويتقل 

بطاطس بيوريه:

بسلق البطاطس وبعدها اهرسها واضيف ليها زبدة وجبن موتزيلا وملح وفلفل اسمر وافضل اقلب فيها على نار هادية حتي تتجانس وبعدها ارش ع الوش ذره مسلوق طعمها فظيييع

وبالف هنااا

8 - فراخ_مشوية_على_الازازة

الطريقة...

• غسلت الفرخة كويس جدا بملح ودقيق وخل وليمون 
• وبعد كدا 
• بصلة مفرومة
• معلقتين زبادى كبيره
• عصير ليمونة
• ملعقتين كاتشب 
• ملح.. فلفل أسمر.. قرفة... جنزبيل ..حبهان مطحون...توم باودر..بصل باودر..كاري...كركم..شطه...بهارات دجاج

وتبلت الفرخة بين الجلد واللحم 
ومليت تلاته تربع الازازة مايه وحطيت جزء من الخليط 

وعلى الفرن ساعة ونص وبالف هنا 

9 - كفتة الفراخ المشوية

المكونات

• نص كيلو صدور فراخ مخليه ومفرومة
• بصله مبشورة وصفيها كويس من المايه وخدى التفل
• 2 فص توم مفروم
• 1/2بقدونس مفروم
• بيضة
• ملح ..فلفل اسمر ..كسبره ناشفة
• جوزة الطيب 
• بصل بودر..توم بودر..بهار دجاج
• ملعقة مستردة
• 3 م بقسماط مطحون
• عيدان خشبية للشوي

الطريقة

• - اخلطى كويس فى الكبه الفراخ مع البصل والتوم والبقدونس والبيضةوالبهارت والمستردة وبعد كدة حطى بقسماط رشة مش كتير لحد ما تلاقى الكفتة بقت متماسكة ثم تدخل فى التلاحه ساعه
• هنطلعها ونصبعيها فى أسياخ خشب وبلي أيدكى بمية البصل علشان تيديها نكهة وبعدين اشويها على الجريل او رصيها على شبكه الفرن وتحتها صنيه مايه فى الرف اللى تحتها ادخلها فرن عالى او اشويها على الفحم أو طاسة تيفال 

10 - مندى الفراخ الذيذ جدا جدا

الطريقة

• بعد نقع الفراخ في محلول الماء وغسلها كويس تقطع الى نصفين او اربعه
• تتبيلة الفراخ : 
• معلقه كبيره زيت .. ملح.. فلفل اسود.. كركم.. ومعلق ببريكا..جوز الطيب..بصل بودر..بودره زعفران (لو متاح)..قرفه
• ونخلط كل المكونات ونتبل الفراخ بيها وتضع في التلاجة حوالى ساعه

الرز:

• 3كوب رز بسمتى ..5 كوب ماء مغلى..بهارات{فلفل أسمر ..بابريكا..بصل بودر..ورق لورا ..حبهان...قرنفل..لومى (لمون مخفف)عودين قرفه..بصل مبشور ..2فص توم صحيح..1 فلفل صحيح..1طماطم مقطعه 

نغسل الرز ونصفية كويس 
نجيب صنية ونضع الزيت والبصل يتشوح ونضيف ليه البهارات كلها ونضيف التوم والفلفل الأخضر والطماطم ونقلب نضيف الرز ونقلب 
جبت طاجن وضفت الخليط فيه ونزلت بالمايه 
جبت شبكة الميكرويف لو مش متاح أي شبكة ممكن عيدان الخشب نعملها شبكة لو مفيش بورق فويل ونغرز بالشوكة 
حطيت الفراخ عليها وغطتها بالفويل ودخلتها الفرن على حراره 200°
حوالى ساعه ونص 
بعدها خرجت الطاجن ودهنت الفراخ بباقى التبيله الفراخ وندخلها تحت الشويه تاخد لون 
نجيب فحمه مولعه ونطفيها بالزيت في الطاجن 

صلصه الدقوس

4طماطم.. معاها 2فص توم..فلفل أحمر. ..فلفل أخضر حار...ملعقه صلصه...عود كسبره خضرا...وبقدونس...ملح ..فلفل أسمر. .ملعقه خل..
تضرب بالهاند بليندر أو الخلالط 

وبالف هنا 

11 - دجاج تندوري من مطبخ مولا

مكونات دجاج تندوري

• ٣ صدور فراخ مخليه . من غير عظم او زي ماتحبي
• كوب زبادي 
• ملعقة بهار تندوري 
• نص معلقة فلفل اسود 
• نص معلقة كمون 
• نص معلقة كسبره ناشفه 
• ملح 
• بابريكا 
• رشه قرفه 
• نص ملعقة شطة (اختياري)
• ملعقه صلصة
• نص معلقة زنجبيل طازج او بودره 
• فصين توم مفروم
• بصله صغيره مبشوره 
• معلقتين زيت 
• عصير نص ليمونة 

الطريقة

بنخلط كل التوابل ونضيف الزبادي والصلصة وعصير اللمون والزيت . ونقلبهم كويس 
وننزل بصدور الفراخ في التتبيله دي ونقلبهم كويس 
وننقع الفراخ في التتبيله دي لمدة 4 ساعات تقريبا 
وبعدين يا نشويهم ع شبكه 
او نحط الفراخ بالتتبيله في صنيه  ونسويها في الفرن بس نخلي النار متوسطه 
وبعد ما استوت ولعت فحمة وطفيتها فيها 
وتتقدم مع رز بالكاري بس انا عملت مكرونة فيونكات وخدت الصوص المتبقي في الصنيه وحطيته عليها بجد فظييييعه

جربوها مش هتندموا

12 - طريقه لدبوس الدجاج أو الاجنحة

التتبيله :

• ملح ..فلفل اسمر..ثوم بودره..بصل بودره..بهار دجاج ..بابريكا ..نص لمونه 
• يتخلط كله مع بعضه وتتبل الدجاج
• في طاسه على النار فيها مكعب زبده وننزل بالدجاج تاخد لون على نار عاليه في الاول وتهدى حتى تستوى لمده نص ساعه 

في حلة :
نضع زنجبيل/ببريكا/فلفل اسمر/ ثوم بودره/صوص الصويا/ ملعقه عسل/معجون فلفل /شطه حاره لو حابه /ملعقه صلصه وتغلي ع النار وتصاف اليها الفراخ وتقلب لمده دقيقين ع النار 
طعمها رهيييب

وبالف هنا 

13 - نجرسكو فظيييييعة

طعمها وهم وشيك جدا في العزوماات وممكن تنفع تتعمل وببواقي فراخ عندك 

المكونات:

• ١/٢ كيلو مكرونه قلم أو شرايط 
• ١/٢ كيلو صدور فراخ مقطع شرائح 
• بابريكا..بصل بودرة..توم بودره
• ملح..فلفل اسمر
• رشه جوز الطيب..رشه زعتر(حسب الرغبة)
• فلفل أخضر (او لو متاح الوان)
• جبن موتزريلا
• زيتون اسمر (لو متاح)
• مشروم (لو متاح)
• ١بصله متقطعة جوانح 
• ١جزرة مبشوره 
• ذبدة

أولا طريقه الفراخ:
طاسه فيها معكب زبدة وعلى نار عاليه ننزل بالفراخ نقلب فيها لحد ما لونها يتغير
نضيف البصل الشرائح والفلفل الأخضر والجزر المبشور ونقلب وبعدها المشروم ونظبط الملح والفلفل اسمر بابريكا وبهار دجاج ورشه زعتر ورشه جوز الطيب 

تانيا طريقه البشاميل:

• كيلو لبن
• ٣معلالق دقيق
• ٣معلالق زيت على سمن او زبدة

طريقه البشاميل

مكعبين كُبار زبده نحمر فيهم الدقيق وننزل باللبن شويه شويه عشان ميكلكعش مع التقليب لغاية ما يبقى قوامه يتقل نضيف الملح والفلفل الاسمر وملعقتين قشطه وبعدين طفي

ثالثاً المكرونه:

اسلقيها في ميا بملح وزيت صفيها وبرديها بالمياه
نقلب المكرونه مع خليط الفراخ وجزء من الجبن الموتزيلاا ونقلبهم كويس
وفي صينيه مناسبه ندهنها زبدة ونحط جزء من البشاميل حوالى ٣ معلالق وبعدين نضيف المكرونه 
ونرش شويه من الجبنه وننزل بباقي البشاميل 
تدخل فرن سخن من قبلها حوالى نص ساعه وبعدها نشغل الشوايه تاخد لون 

و بالف هنا

14 - كفتة فراخ محشية

• 3صدور دجاج بعد النقع والغسل يتفرموا مع بقدونس وملعقه زبده ..وملح ..وبابريكا ..وفلفل اسمر ..وتوم باودر.. وبصل باودر .. بهار دجاج 

تفرد علي نايلون مدهون زبده وتقطع دوائر وتحشى جبنه مخلوطه ببقدونس وزيتون وموزاريلا وتقفل ع بعضها وتخلط في بقسامط وتحمر ع نار متوسطه

و بالف هنا

15 - دجاج تكا مسالا 

المكونات:

• كيلو من صدور الدجاج
• علبه زبادى
• نص ملعقه ص كمون 
• نص ملعقه ص فلفل اسمر 
• 2ملعقه بابريكا
• نص ملعقه ص زنجبيل 
• ملعقه من بهارات المسالا
• نص ملعقه ص كاري/نص ملعقه كركم
• نص ملعقه ص شطه 
• ملعقه زبده
• نص لمونه
• بصله مفرومه/2فص توم 
• لصوص الدجاج:
• 3ملعقه كبيره صلصه طماطم
• ملعقه كبيره معجون فلفل حار
• كريمه طبخ 
• بقدونس للتزين

الطريقه:

بعد ماتغسل الدجاج تقطع مكعبات صغيره وتتبل بالملح والفلفل والكمون والشطه والزبادى وبهارات المسالا والزنجبيل وللمون وتدخل في التلاجه حوالى ساعه
في طاسه تدهن بالزبده وتنزل بالدجاج تاخد لون دهبي وتنشل منها 
في نفس الطاسه صفري بصله وتوم ضيفي البهارات بابريكاو كاري شطه وكسبره بهارات المسالا وتقلب 10ثوانى كداو انزلى بمعجون الصلصه ومعجون الفلفل الاحمر وبعدين كوب ماء وكريمه الطبخ وبعدين الدجاج وهدي عليها النار حوالى نص ساعه 
وبعدين تزين بكريمه الطبخ وبقدونس 

وبالف هنا 

16 - الرز البخاري بالدجاج ولا اسهل ولا اروع من طريقتي

يغسل الرز وينقع ويتركن في جانب 

تتبليه الدجاج

• تغسل وتشق بالسكين عشان تشرب التبيله وهي بصل بودر/توم بودر/ملح/فلفل اسمر/قرفه/كاري/كركم/بهارات دجاج/معجون فلفل احمر حار /لمونه /زيت زيتون ويتخلطوا كلهم ويضافوا ع الدجاج 
• طاسه سخنه وفيها ملعقه زيت انزلي بالدجاج ع نار عاليه تاخد اللون الدهبي من الجانبين وقطعي بصله جوانج وطماطميه وهدى عليها النار بعدها

الرز

• في حاله بصل جوانح 3فصوص توم من غير هرس مجرد يتشق بالسكينه من الجانب /ورق غار/حبهان/قرنفل/لومى/فلفل اسمر/قرفه/بصل بودر/كاري/كركم /جزر مبشور ويتلوح كل دا مجرد دقيقه ويضاف مياه مغليه/ملح وينزل بالرز وبعد ماينشف تكوني نقعه زبيب في مايه واعملي حفره في النص وحطيه فيها وغطي بالرز عليه و حطي الدجاج ع الوش وهدى النار حوالي نص ساعه ويكون جاهز 

فحميه متولعه وانزلي في الحله وغطي عليها 
وكلوا احلى واطعم رز بالبخاري وادعولي 😋😋

ممكن تضيفي اي مكسرات بتحبيها 

17 - برجر دجاج بطريقة اكتر من روووووعة واللي تجربه تدعيلي

المكونات

• نص كيلو صدور بانيه مفروم
• معلقه بصل باودر 
• معلقة توم باودر 
• معلقه صغيرة ملح
• معلقه بابريكا
• معلقة فلفل اسود
• نص معلقه صغيرة جنزبيل بودر
• ملعقه شطة اختياري
• بصله مبشوره 
• كيس من خلطة البرجر ماجي

الطريقه

بنخلط كل المكونات مع بعض في الكبه يتخلطو كويس وبعدين لحد ما البرجر يلم ونقدر نشكله نندهن ايدينا بزيت وبعدين نشكله دواير بأي غطا برطمان 
يدخل في الفريز حتي يتجمد سويته علي الجريل ممكن في طاسه تيفال مدهونه زيت 
العيش نص كيلو دقيق عليه رشة ملح وعلبتين زبادى صغيرين.... وعليهم معلقه كبيره ممسوحه خميره ومعلقه كبيره ممسوحه سكر ....و3معلالق لبن بودره ...ونص كوباية لبن دافى واقلب كويس ولما الخميرة تعلي احطهم عالدقيق واعجن وبعد كده ٤ معالق زيت واعجن وازود مايه دافيه لغايه ما العجينه تلم وتبقي بتلزق حاجه بسيطه واخدها علي الكونتر او الرخامه واعجن فيها لا يقل عن عشر دقايق ودى اهم حاجه لنجاح العيش وبعدها اسيبها ترتاح وتخمر وبعد كده اهبطها تانى واسيبعا تخمر وبعدين اقطعها كور اد البيضه الصغيره وبعد كده تغطيهم وتاخدى واحده وتجيبي غطا برطمان كبير وتحطى فيه كيس وتفردى العجين علي اده وبعد كده تدهنى وشها زيت علي لبن ورشه من السمسم وحبة البركة وبعدين تسيبيه يخمر وبعدها يدخل فرن 200 علي اول رف من تحت والشوايه علي اقل حاجه وبعد ما يخرج تغطيه بفوطه منديه عشان يفضل طرى.....

وتعملي احلي سندوتشات برجر....... وتحطى كاتشب ومايونيز وخس وطماطم وبصل والبرجر وجبنه شيدر....

وبالف هنا 

18 - جيوب اللازانيا المحشية

ممكن تحشوها اي حاجه تحبوها بعشقها بالفراخ وسبانج طعهما وهم فظييعة جدا 😋

المكونات

• استخدمت ١٦قطعة من اللازانيا او على حسب افراد الاسره
• ٢صدر من الدجاج متقطع صغير
• بشاميل
• جبن موتزيلا 
• زيتون اسمر
• سبانج استخدمت مجمده النوع دا حلو جدا العملاق الاخضر

الطريقة

• الاول الفراخ تتبل بملح وفلفل اسمر زعتر وسماق وبصل بودر وتوم بودر وملعقه زيت زيتون
• في طاسه سخنه ننزل فيها بالفراخ على نار عاليه مع التقليب وبعدها نهدي النار عليها لحد ما تستوي
• ثانيا السبانخ هنحطها في حلة ونبشر عليها بصله وفص توم ونهدى عليها النار ونظبط الملح والفلفل اسمر وكسبره ناشفه وبعد ما تستوي نقلب فيها الفراخ ونقطع عليهم زيتون 
•  ثالثا نسلق اللازانيا في مايه مغليه فيها ملح وملعقه زيت وبعدها نطلعها في صنيه فيها مايه بارده
• نفرد قطعه من اللازانيا بالطول ونحط في الوسط ملعقه من البشاميل ثم قطعه تانيه بشكل عكسي ونحط عليها ملعقه من البشاميل ثم خليط الفراخ بالسبانخ وشويه من الجبن الموتزيلاا 
• ونتني اطراف اللازانيا للداخل وندخله في بعضه ونحطها في صنيه فيها ملعقه من البشاميل ونحط ع الوش بشاميل وجبن موتزيلا 

وتدخل فرن سخن ١٥دقيقه ونحطها تحت الشواية تاخد لون
بجد طعهما فظيييعة 

و بالف هنا

19 - رول الدجاج المحشي 

• ك صدور دجاج مغسول كويس
• ملح/فلفل اسمر/بابريكا/توم باودر/بصل بودر/بهارات دجاج/عصير لمون
• للحشو: زيتون اسمر/ذره /ببروني متقطع/جبن موتزريلا 

نفتح الدجاج من الجنب ونفردها بين كيسين نايلون أو استريتش رول وندقها بالشاكوش ونتبلها بالبهارات ونحشيها بالخليط ونلفها علي شكل رول مثل السويسرول وتربط بالخليط 
تحمر في صنية بقطعه زبدة ممكن تقطعي خضار معاها بطاطس وبسله وجزر وبصل وتوم وتضاف ليه نص كوبايه مايه وبعد ما تستوي تبرد وتقطع 

جربوا بجد خطيرررره هتعجبكم جدا

20 - فراخ مشوية بطريقة مطبخ مولا
تنقع الدجاج في ماية وملح وخل كمون وتغسل كويس جدا 

مكونات التبيلة:

• زبادي ..ملعقة صلصة.. لومي مطحون ..بهارات مسالا..بهارات دجاج...بصل بودر..توم بودر...بابريكا..فلفل أسمر ..قرفه ..حبهان مطحون .. كاري.. شطه ..عصير نص كوب برتقال 

يختلط كل المكونات ونتبل الدجاج من الداخل والخارج لمدة لا تقل عن ساعتين
عملتها في آير فراير او تتعمل في الفرن هتبقي حلوه برضه جدا 
وفي الآخر كنت مولعه فحمه وحطيتها في نص الدجاج ونقطة زيت وغطيت عليها تاخد رائحة الفحم 
جربوها وادعولي

وبالف هنا 

21 - طاجن دجاج بالموتزيلاا 

• كيلو من صدور الدجاج يتبل كويس ..بملح ..وفلفل اسمر و..جوز الطيب.. بصل بودر و..توم بودر.. باريكيا.. بهار دجاج ..زنجبيل ..عصير لمون
• يختلط كل البهارات وتتبل الدجاج حوالى نص ساعه في طاسة سخنه وفيها قطعه زبده 
• تحمر الدجاج من الجانبين تاخد لون ونهدى عليها النار تستوى حوالى نص ساعه ونشيلها من الطاسه تبرد وتقطع 
• في نفس الطاسة نقطع بصله جوانج ونضيف عليها مشروم حوالى دقيقتين 
• ملعقه دقيق كبيره مدوبه في ماية وننزل بيها على المشروم
• تقلب ونضيف كريمه طبخ 
• نظبط الملح والفلفل ونضيف الدجاج 
• تاخد غلوه نفطي النار ونحطها في طاجن ونضيف جبن موتزريلا على الوش
• تدخل الفرن حوالى ربع ساعه

بجد طبق وهم تحفة وبالف هنا 

22 - صدور الدجاج بالجبن والسبانخ

الطريقة:

• صدور فراخ تتشرح بالعرض من غير ماتنفصل
• وتتبل بملح ..وفلفل اسمر.. شطه (حسب الرغبه)
• وبهارات دجاج..زعتر 
• سبانخ تتغسل وتتنشف وتتقطع ونجيب طاسه نحط زيت زيتون ونشوح بصله مقطعه وبعدين ننزل بالسبانخ (استخدمت مجمده) ونقلب مع رشة ملح ..وفلفل اسمر.. وسماق 
• تدبل ونشيلها علي جمب 
• علبة جبنبة مبشوره لما تبرد السبانخ نقلبهم مع بعض 
• هانحشي الفتحات بتاعة الفراخ اللي بيبقي واضح في الصور 
• في الصينيه هنحط قطعه زبدة ونرص وبعدين الصدور 
• بعدين نرش فيچيتار أو بقسماط ونغطي الصنية ونخليهم علي حراره عاليه في الفرن لمدة حوالى ٤٠دقيقه 
• وبعدين نكشف الغطا عشر دقايق من فوق ونسيبه تحمر 

الصدور هايبقي طالع منها فيها صوص كده هايتحط معاها في الطبق 

و بالف هنا